เทฺวนวุเต อิโต กปฺเป อญฺชลึ อกรึ ตทา ทุคฺคตึ นาภิชานามิ อญฺชลิสฺส อิทํ ผลํ ฯ จตุปณฺณาสกปฺปมฺหิ มิคเกตุสนามโก สตฺตรตนสมฺปนฺโน จกฺกวตฺติ มหพฺพโล ฯ ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา ฐิตญฺชลิโย เถโร อิมา คาถาโย อภาสิตฺถาติ ฯ ฐิตญฺชลิยตฺเถรสฺส อปทานํ สมตฺตํ ฯ ทสมํ ตีณิปทุมิยตฺเถราปทานํ (๘๐)

---

[๘๒] ปทุมุตฺตโร นาม ชิโน สพฺพธมฺมาน ปารคู ทนฺโต ทนฺตปริวุโต นครา นิกฺขมี ตทา ฯ นคเร หํสวติยา อโหสึ มาลิโก ตทา ยํ ตตฺถ อุตฺตมํ ตีณิ ปทุมปุปฺผานิ อคฺคหึ ฯ อทฺทสํ วิรชํ พุทฺธํ ปฏิมคฺคนฺตราปเณ สห ๑ ทิสฺวาน สมฺพุทฺธํ เอวํ จินฺเตสหํ ตทา ฯ กึ เม อิเมหิ ปุปฺเผหิ รญฺโญ อุปฏฺฐิเตหิ เม คามํ วา คามเขตฺตํ วา สหสฺสํ วา ลเภยฺยหํ ฯ #๑ ยุ. โสหํ ฯ