กุเวรสฺส โข ปน มาริส มหาราชสฺส วิสาณา นาม ราชธานี ตสฺมา กุเวโร มหาราชา เวสฺสวโณติ ปวุจฺจติ ฯ ปจฺเจสนฺโต ปกาเสนฺติ ตโตลา ตตฺตลา ตโตตลา โอชสี เตชสี ตโตชสี สุโร ๑ ราชา อริฏฺโฐ เนมี ฯ รหโทปิ ตตฺถ ธรณี นาม ยโต เมฆา ปวสฺสนฺติ วสฺสา ยโต ปตายนฺติ สภาปิ ตตฺถ ภคลวตี ๒ นาม ยตฺถ ยกฺขา ปยิรุปาสนฺติ ฯ ตตฺถ นิจฺจผลา รุกฺขา นานาทิชคณายุตา มยูรโกญฺจาภิรุทา โกกิลาภิหิ ๓ วคฺคุภิ ฯ ชีวญฺชีวกสทฺเทตฺถ อโถ โอฏฺฐวจิตฺตกา กุกฺกุฏกา กุฬีรกา วเน โปกฺขรสาตกา ฯ สุกสาลิกสทฺเทตฺถ ทณฺฑมาณวกานิ จ โสภติ สพฺพกาลํ สา กุเวรนฬินี สทา ฯ

---

[๒๑๓] อิโต สา อุตฺตรา ทิสา อิติ นํ อาจิกฺขตี ชโน ยํ ทิสํ อภิปาเลติ มหาราชา ยสสฺสิ โส ฯ ยกฺขานํ อาธิปติ ๔ กุเวโร อิติ นามโส รมตี นจฺจคีเตหิ ยกฺเขหิ ๕ ปุรกฺขโต ฯ #๑ ม. ยุ. สูโร ฯ ๒ ม. สาลวตี ฯ ๓ ม. โกกิลาทีหิ ฯ #๔ ม. ยกฺขานญฺจ อธิปติ ฯ ๕ ม. ยกฺเขเหว ฯ