ปญฺจมํ สุวณฺณปุปฺผิยตฺเถราปทานํ (๑๑๕)

---

[๑๑๗] วิปสฺสี นาม ภควา โลกเชฏฺโฐ นราสโภ นิสินฺโน ชนกายสฺส เทเสสิ อมตํ ปทํ ฯ ตสฺสาหํ ธมฺมํ สุตฺวาน ทิปทินฺทสฺส ตาทิโน โสวณฺณปุปฺผานิ จตฺตาริ พุทฺธสฺส อภิโรปยึ ฯ สุวณฺณฉทนํ อาสิ ยาวตา ปริสา ตทา พุทฺธาภา จ สุวณฺณาภา อาโลโก วิปุโล อหุ ฯ อุทคฺคจิตฺโต สุมโน เวทชาโต กตญฺชลี ปีติสญฺชนโน ๑ เตสํ ทิฏฺฐธมฺมสุขาวโห ฯ อายาจิตฺวาน สมฺพุทฺธํ วนฺทิตฺวาน จ สุพฺพตํ ปาโมชฺชํ ชนยิตฺวาน สกํ ภวนุปาวิสึ ฯ ภวนํ ๒ อุปวิฏฺโฐหํ พุทฺธเสฏฺฐํ อนุสฺสรึ เตน จิตฺตปฺปสาเทน ตุสิตํ อุปปชฺชหํ ฯ เอกนวุเต อิโต กปฺเป ยํ ปุปฺผมภิโรปยึ ทุคฺคตึ นาภิชานามิ พุทฺธปูชายิทํ ผลํ ฯ โสฬสาสึสุ ราชาโน เนมิสมฺมตนามกา เตตาฬีเส อิโต กปฺเป จกฺกวตฺตี มหพฺพลา ฯ ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ #๑ ม. ยุ. วิตฺติสญฺชนโน ฯ ๒ ม. ยุ. ภวเน ฯ