ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา เวทิการโก เถโร อิมา คาถาโย อภาสิตฺถาติ ฯ เวทิการกตฺเถรสฺส อปทานํ สมตฺตํ ฯ จตุตฺถํ สปริวาริยตฺเถราปทานํ (๑๔๔)

---

[๑๔๖] ปทุมุตฺตโร นาม ชิโน โลกเชฏฺโฐ นราสโภ ชลิตฺวา อคฺคิกฺขนฺโธว สมฺพุทฺโธ ปรินิพฺพุโต ฯ นิพฺพุเต จ มหาวีเร ถูโป วิตฺถาริโก อหุ ถูปทตฺตํ ๑ อุปฏฺเฐนฺติ ธาตุเคเห วรุตฺตเม ฯ ปสนฺนจิตฺโต สุมโน อกํ ๒ จนฺทนเวทิกํ ทียติ ธูปคนฺโธ จ ถูปานุจฺฉวิกํ ๓ ตทา ฯ ภเว นิพฺพตฺตมานมฺหิ เทวตฺเต อถ มานุเส โอมตฺตํ เม น ปสฺสามิ ปุพฺพกมฺมสฺสิทํ ผลํ ฯ ปญฺจทเส กปฺปสเต อิโต อฏฺฐ ชนา อหุํ สพฺเพ สมตฺตนามา เต จกฺกวตฺตี มหพฺพลา ฯ ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ #๑ ม. ทูรโตว .. ฯ ยุ. ถูปํ รตฺตํ ฯ ๒ โป. รตฺตจนฺทนเวทิตํ ฯ ๓ ม. ถูปานุจฺฉวิโก ฯ