เอกตฺตึเส อิโต กปฺเป ยํ ปุปฺผมภิโรปยึ ทุคฺคตึ นาภิชานามิ พุทฺธปูชายิทํ ผลํ ฯ อิโต จ นวเม กปฺเป ราชา สตฺตุตฺตโม อหุ สตฺตรตนสมฺปนฺโน จกฺกวตฺติ มหพฺพโล ฯ ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา กกฺการุปูชโก เถโร อิมา คาถาโย อภาสิตฺถาติ ฯ กกฺการุปูชกตฺเถรสฺส อปทานํ สมตฺตํ ฯ ปญฺจมํ มนฺทารวปุปฺผปูชกตฺเถราปทานํ (๑๕๕)

---

[๑๕๗] เทวปุตฺโต อหํ สนฺโต ปูชยึ สิขินายกํ มนฺทารเวน ปุปฺเผน พุทฺธสฺส อภิโรปยึ ฯ สตฺตาหํ ฉทนํ อาสิ ทิพฺพมาลฺยํ ๑ ตถาคเต สพฺเพ ชนา สมาคนฺตฺวา นมสฺสึสุ ตถาคตํ ฯ เอกตฺตึเส อิโต กปฺเป ยํ ปุปฺผมภิโรปยึ ๒ ทุคฺคตึ นาภิชานามิ พุทฺธปูชายิทํ ผลํ ฯ อิโต จ ทสเม กปฺเป ราชาโหสึ ชุตินฺธโร สตฺตรตนสมฺปนฺโน จกฺกวตฺติ มหพฺพโล ฯ #๑ ม. ทิพฺพํ มาลํ ฯ ๒ ม. ปุปฺผมภิปูชยึ ฯ