เวหายเส จงฺกมติ ทีโป ๑ ปชฺชลิเต ตถา หาสํ ๒ มมํ วิทิตฺวาน ปกฺกามิ ปาจินามุโข ฯ ตญฺจ อจฺฉริยํ ทิสฺวา อพฺภูตํ โลมหํสนํ นาคปุปฺผํ คเหตฺวาน คตมคฺคมฺหิ โอกิรึ ฯ สตสหสฺเส อิโต กปฺเป ยํ ปุปฺผํ โอกิรึ ๓ อหํ เตน จิตฺตปฺปสาเทน ทุคฺคตึ นูปปชฺชหํ ฯ เอกตฺตึเส ๔ อิโต กปฺเป ราชา อาสึ มหารโถ สตฺตรตนสมฺปนฺโน จกฺกวตฺติ มหพฺพโล ฯ ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา นาคปุปฺผิโย เถโร อิมา คาถาโย อภาสิตฺถาติ ฯ นาคปุปฺผิยตฺเถรสฺส อปทานํ สมตฺตํ ฯ นวมํ ปุนฺนาคปุปฺผิยตฺเถราปทานํ (๑๕๙)

---

[๑๖๑] กานนํ วนโมคฺคยฺห วสามิ ลุทฺทโก อหํ ปุนฺนาคํ ปุปฺผิตํ ทิสฺวา พุทฺธเสฏฺฐํ อนุสฺสรึ ฯ ตํ ปุปฺผํ โอจินิตฺวาน สุคนฺธํ คนฺธคนฺธิกํ ๕ ถูปํ กริตฺวาน ปุฬิเน พุทฺธสฺส อภิโรปยึ ฯ #๑ ม. ธูปายติ ... ฯ ยุ. ธูโปติ ชลเต ตถา ฯ ๒ ยุ. เวหาสํ มม ทิตฺวาน ฯ #๓ ยุ. อภิโรปยึ ฯ ๔ ม. เอกตึเส กปฺปสเต ราชา อาสิ มหารโห ฯ ยุ ... อาสึ มหรโถ ฯ #๕ ม. คนฺธิตํ สุภํ ฯ