อฏฺฐารสโม กุมุทวคฺโค ปฐมํ กุมุทมาลิยตฺเถราปทานํ (๑๗๑)

---

[๑๗๓] ปพฺพเต หิมวนฺตมฺหิ มหาชาตสฺสโร อหุ ตตฺถโช รกฺขโส อาสึ โฆรรูโป มหพฺพโล ฯ กุมุทํ ปุปฺผิตํ ๑ ตตฺถ จกฺกมตฺตานิ ชายเร โอจินามิ จหํ ๒ ปุปฺผํ ผลิโน สมิตํ ๓ ตทา ฯ อตฺถทสฺสี ตุ ภควา ทิปทินฺโท นราสโภ ปุปฺผํ สงฺโกจิตํ ทิสฺวา อาคจฺฉิ มม สนฺติเก ๔ ฯ อุปาคตญฺจ สมฺพุทฺธํ เทวเทวํ นราสภํ สพฺพญฺจ ปุปฺผํ ปคฺคยฺห พุทฺธสฺส อภิโรปยึ ฯ ยาวตา หิมวนฺตสฺมึ ๕ ยาว ๖ มาลา ตทา อหุ ตาวจฺฉทนสมฺปนฺโน ๗ อคมาสิ ตถาคโต ฯ อฏฺฐารเส กปฺปสเต ยํ ปุปฺผมภิโรปยึ ทุคฺคตึ นาภิชานามิ พุทฺธปูชายิทํ ผลํ ฯ อิโต ปณฺณรเส กปฺเป สตฺตาเหสุํ ชนาธิปา สหสฺสรถนามา เต จกฺกวตฺตี มหพฺพลา ฯ ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ #๑ โป. ม. ยุ. ปุปฺผเต ฯ ๒ ม. จตํ ฯ ๓ โป. ม. ยุ. สมิตึ ฯ #๔ ม. ยุ. สพฺพตฺถ สนฺติกํ ฯ ๕ ม. หิมวนฺตนฺตา ฯ ยุ. หิมวนฺตโต ฯ #๖ ม. ปริสา สา ตทา อหุ ฯ ยุ. ยาว สมฺมนฺตโต อหุ ฯ ๗ ยุ. อคฺคจฺฉทนสมฺปนฺโน ฯ